بلقيس . . .؟!

( 3 )

بدأت اصابع بلقيس ترتعش وهي تقرأ الورقه التي بين يديها هكذا هي دائما تعشق اليقين المطلق لتكون خطواتها واثقه فلم تتعود ابداً الدوران والعوده الى الوراء .. شعرت ان شيئاً من الدفئ ينزلق من عينيها الى وجنتيها كان ذلك الدفئ نتيجة لمخاضات ولوج الدمعة الساخنة عندها لجأت لكبريائها الانثوي وتعكزت على فتات بقايا صبرها .. كانت عبثاً تخبأ دمعها المنهر بأبتسامتها المصطنعة قالت متحسرة محزونة معتذرة :

عذراً ان اقتحمت احلامك الوردية او عكرت مزاج خيالك البنفسجي .. عذراً لو تسللت الى بقايا نبضات الحب في قلبك ودغدغت هتلرية مشاعرك .. أنت تحب الشمس وانا لست سوى ظل شجر وانت شاعر رحال وانا وطن منسي ومهما اشتقت لظل شجري تظل تحب السفر .. واليوم عذراً رسالتك الآخيرة كانت بمثابة رصاصة الرحمة في راس حبي الكبير.

إلى ملهمتي ؟!!

لازال قلمي ينحت مأساتي بإخلاص في قلبِ الصمّ الصياخيد وينثرني على صفحات الأيام حروف عذراء لم يطمثهن إنس من قبل ولا جان ويغتسل بالطهر من نشوة مداعبة الكلمات التي راحت تهتز أشياءها من خشوع وتتمايل في غنج الانوثة وترتشف من خمر السطور ولا تثمل .. وأنتِ يا أنتِ ما زلت كلما أردت الحديث عنها أتدثر برداء اللغة وأعريها من صمتها الخجول .. وانتِ كما أنتِ مالحة المذاق تخلعي وترتدي الكلمات عن ضجر جسدي وعلى عجل كبير .. دوماً صوتكِ عارياً من الحرف مكسواً بلهفة مجنونة لمعانقة السطر . . لا زلتي يا دمعة الفقراء بركان جنون … وقنبلة مشاعر ولكنكِ صامتة …؟؟؟

تموز السامط والمسموط :

قبل ان ابدأ بسرد حكايتي معكم الامر يتطلب طقوساً أقرب إلى السِّحر وشعائرَ تغالي في الطهر والنقاء فمن أجل ذلك كلِّه أرجوكم أن توقدوا معي الشموع وتتلو ترانيم العشق العذري .. شابة ممتلئة الجسم ذات صدر نافر وقوام جميل وخدَّين مُفعمين بالحيوية وعينين مُشرقتَين يكتمل بحضورها السرور ويشيع مع ابتسامتها الأمن والطمأنينة في النفوس تلكم هي (عشتار) إلاهة الخصب والحبّ والجنس لدى سكان وادي الرافدين القدماء .. وهي ابنة اللإله (سين) إله القمر وأمها الإلهة ننكال وأخوها الإله (أوتو) إلاه الشمس وأختها الإلهة (إيرشيكال) إلهة العالم السفلي عالم الأموات .. ذات مرة وفي طريق العودة الى منزلها تلتقي عيناها الراعي دموزي أو (تموز كما يسميه الأكديون ) إله الرعي ويخفق قلبها لحبِّه خفقاناً ينسيها كلَّ عشاقها السابقين الذين تعرفت عليهم في الفيس بوك ومن ثم التقت به ذات ليلة عندما كانت ترقص وحدها متألقة في حلبة الرقص لامعة مثل كوكب الزهرة في سماء ربيعية. وضع يده بيدها واحتضنها فحاولت الإفلات منه راجية إياه أن يخلي سبيلها لترجع إلى أمها فقد تأخرت عن موعد عودتها إلى البيت فقال لها : ان كان لابد من عودتكِ اعطيني رقم هاتفكِ النقال كي نكمل حديثنا على الواتساب واضيفيني الى قائمة اصدقائكِ في الفيس بوك وما ان وصلت الى البيت كانت الكهرباء مطفية للتو وبعد التوسل ب (ابو المولد) شغل على مضض ( من وره خشمه ) وما ان بدأت ( بالتكنيك ) فوجئت ان الاشتراك في الانترنت قد لفظ انفاسه الاخيرة وعلى عجالة اتصلت بصاحب ( المنظومة ) ليعيد اشتراكها وما ان عاد النت تنفست الصعداء وبلهفة العشاق رنت على حبيبها تموز فتجاذب أطراف الحديث الممزوج بالاشتياق وفتح كل منهما كاميرتة للآخر حتى طفقا يخصفان عليهما من بقايا لحافهما حتى لا تبدي لَهما سوآتهمَا ( انتم افهموها ) وما هي ألا لحظات معدودة من الشغف المبلل واذا بأخيها الإله (أوتو) إلاه الشمس يخترق صمتهما المطبق ويبدد خلوتهما المجنونة ويدخل الى خدر اخته دون استئذان فيشاهد (عشتار) شبه عارية وفي الطرف الآخر من الكاميرة تموز كذلك فغضب غضبا شديدا فقال : مقولته الشهير (ويحك ياتموز لسوف اسمطك سمطا بحرارة الشمس) ومنذ ذلك التاريخ وتموز مسموط بالحر وسامطنه وياه ؟!

چنت أزغير :

غصت في أعماق ذاكرتي الحبلى بالذكريات ودون ان أشعر أخذتني أرهاصة شوق لذلك الماضي القريب فأجدني أهتز طربا وأنتشي سرورا حين خالجني الحنين وما أعذبه من حنين يمتطي صهوة جواد الأيام الجميلة المفعمة بالبراءة والحيوية ويحملني الى حيث أيام طفولتي البريئة .. فعندما كنت صغيرا أرى كل الوجوه مرسومة في وجه امي وكل الدنيا قد اختزلتها خصلة من شعر امي كنت العب وألهو واركض هنا احلم بأشياء أكبر مني واضحك بملأ الحياة فرحا هناك .. ووجه ابي كان اخر محطات المساء بعد يوم طويل من اللهو واللعب كنا نستدير كالحلقة حوله بعد ان يكمل لف سيجارته واخذ نفس عميق من دخان تلك السيجارة يضع يده على خده قبل ان يبدأ بسرد حكايته المسائية يتنهد بحسرة (چبير العمر من يذكر شبابه ) ومن ثم يتلو صحائفه ( گبل يا بويه چانت أبيوت اهلنه صرايف مبنيه من گصب الهور ومسگوفه بالباريات وبيوم من الايام شبت حريجه ابيت ابو احميد لان ام احميد نامت ونست اللالة واجه وما حسو اله والنار علگت بصريفتهم گعد ابو احميد مرعوب من نومته وبالگوه گدر يطلع بس الجهال چانت الدنية ليل شته بارد وكل الوادم منومه وحتى من يفزع اهل السلف محد راح يسمعه باوع بحسره على شگه العمر تأكله النار وهو لا حوله اله ولا قوه ) ابتلع شهقة بعمق حزنه وطرح زفيره محمل بألم الحيرة فأخذته سِنَةٌ لبرهة قصيرة جدا من الزمن فرمق بطرفه الضفة الاخرى من النهر الذي كان يفصله عن بيت صديق عمره أبو عناد وتمتم بينه وبين نفسه ( تمنيت كون هسه أبو عناد يمي ) وكأن الريح استرقت عنوة من قلب أبو احميد تمتمته ونفثتها في قلب صديقه أبو عناد وعلى غير عادته نهض أبو عناد من نومه مفزوع ومرعوب من حلم (جيثوم) عكر عليه لذة نومه وما ان فتح عينيه ابصر نارا تلتهم بيت صديقة أبو احميد ودون وعي منه رمى بنفسه الى النهر الذي كان شبه متجمد في تلك الليلة من ليالي ( الازرگ ) غير آبه بصحته وعبر الى الضفة الأخرى من النهر لينقذ صديقه فوصل متأخرا بعد ان التهمت النيران كل شيء فجثم على ركبتيه لشدة خجله من أبو احميد فقال له اسفا ومعتذرا ( يخويه عمت عين النوم اللي اخرني عنك ومادام خشمك يشم الهوه فدوه الك البيت واللي بيه ) وفي اليوم التالي غادر أبو عناد بيته الطيني ليهبه وما فيه الى صديقة أبو احميد ويسكن هو وعائلته في العراء .. بعدها ختم والدي حكايته لذلك المساء ببيت دارمي ممزوج بدموع كبريائه ( كون الصديج ايصير هيچ لصديجه .. عبرته بنص الليل تسوه الحريجه ) .. عندما كنت صغيرا كانت الحياة تتنفس إنسانية وتنطق حبا وايثار .. عندما كنت صغيرا كان هناك انسان يحب الانسان ؟!!

جـــداحه للبيـــع ؟!!

چان اكو واحد بمنطقتنه يصحوله أبن العوره وهذا الشخص ماوره بس الطلايب والمشاكل وفد واحد حرامي وسكير يشرب العرگ بالقندرة واربعه وعشرين ساعة بس يشمشم بالسوكتين ومكبسل ومشخط جسمه من الطول للطول بالموس يوميه جاي يطوطح ومسويله عركه بالمنطقه واذا فد يوم مالگه واحد يتعارك وياه يتعارك وي اهدومه ويظل ايدچچ بروحه بسچينته .. حب بت جيرانهم وأخذ مشيه وراح يخطبهه من اهلهه بس أهل الابنيه رفضوه لان يعرفونه فد واحد ادبسز فتزامط وي ابوهه گاله: يجي يوم واخذهه غصبن على خشمك وأبلاش وفوگاهه أگعد عله على گلوبكم أبيتكم .. راحت واجت الايام وبهذاك اليوم أتفق وي حبيبته تضم خشل ( ذهب) امهه بمكان محد يندله وتگول أنباگ.. ثاني يوم اهل الابنية دورو على الخشلات ومالگوهن .. وأبن العوره معروف ماركة عالمية مسجلة بالبوگ وكل المنطقه تعرفه فد واحد سافل وعفطي فوقع الشك عليه گالوله رجع الذهب الي بگته لا نسلگ والدي والديك .. گالهم عمي عدكم شاهد عليه عدكم دليل عليه گالوله لا ماعدنه گالهم چا عمي ما الكم عليه بس اليمين أحلف وابره .. وصارت گعده عشائرية گالوله يبن العوره تحلف وبعد تلاث تيام اذا ماصار بيك شيء انت بريء واحنه فصاله گالهم واذا انتم صار بيكم شئ بهل تلاث تيام بأعتباركم متهميني باطل گالوله انفصلك مربع گلهم خوش وشگد راح تفصلوني گالول خمس ملايين (بذاك الوكت بس التاجر يملكهن) گلهم يعني وي المربع يصيرن عشرين مليون .. المهم حلف ابن العوره صار الليل طلع حرگ الكاروبة مالتهم واخذ العشرين مليون .. المگاريد اهل الابنية رهنو بيتهم وكلشي عدهم حتى يسددون الفصل .. رجع ابن العوره خطب بتهم واشتره بيتهم وباقي الفلوس اشتره بيهه سياره وفتح مشروع ورشح للانتخابات وهسه يشغل منصب المستشار القانوني بالحكومه .. ويجي واحد بطران ويگلك سليم الجبوري شلون طلع براءة بخمس دقائق ... اگلگم احنه عليمن چنه نسولف نسيت سالفتي .... هااااا اتذكرت .. فدوه عندي ظروف طارئه كلش ووضعي المادي تعبان وعندي جداحه للبيع فدوه لا واحد يكسر بسعرهه

بلقيس . . .؟!

(2 )

بلقيسُ كائنٌ أسطوري جاءَت من أقصى صقاعِ الكون، وأختَرقت طبقة الأوزون مُتَجاهلةً نَعِيقُ تَشاؤُم الثُقب الاسود، أرتدت ثِياب عِرسها من سُنْدُسٍ وَإِسْتَبْرَقٍ مطرّزة بألوان قوس قزح .. أنثى لا تحتويها الابعاد الثلاثة ولا تُشبهها أنوثةَ نساءِ الأرض .. إلتقيتُها للوهلة الأولى بعد فواتِ الآوان .. كانت ترسمُ خطوطَ الطولِ والعرضِ في خارطةِ أيامي منذ عامٍ مضى دون أن أعلمَ وجودها ودون أن أشعر بهمسِ حضورها الأنيق .. تنقّب في صحراءِ حياتيَ القاحلةَ بحثاً عن قطرةِ ماءٍوتنفض الغِبار عن وجه ذاكرتي بحثاً عن بقايا أثار .. ومُذ علمتُ وجودها فتشتُ لها في زوايا القلبِ عن وطنٍ .. وطن وإن كان لا يصلح للسكن .. ولكن ؟! بعد أن أعياني البحث وأضناني النَصَبْ ، تذكرتُ متأخراً أنّي ذاتَ مرةٍ حين أصاب قلبُ الوطن مرضاً عضال تبرعتُ له بقلبي .. عذراً يا بلقيس وألف عذراً بين أضلعي لا ينبض قلب ليكون لسمو قدومكِ وطن يليق بإقامتكِ

بلقيس . . ؟!

( 1 )

بلقيس اخر النساء الجميلات انحدرت من عالم الذر وارتدت رداء الانوثة ونساء الارض لازلن عراة انوثتهن .. بلقيس امرأة من بلادي تقاعدت الحياة مبكرا وهي تتعكز بصبرها على شفير جرف هار وتلوذ بأخر ما تبقى في جعبتها من كبرياء تفضحها بين الفينة والفينة دمعة تنهمر على خدها دون ارادة منها حاولت مرارا ان تغتالها فلم تفلح .. ذات مرة لملمت شتاتها المبعثر واشاحت بوجهها نحو المجهول كانت تبحث عن مأوى يليق بمأساتها وعن يد تربت على كتف معاناتها فافترشت رمال البحر المكتظ بجثث الغرقى ورمت فوق الموج ضفائرها السومرية التي ورثتها عن جدتها شبعاد وظللت برمشها الاطفال الغرقى لعلها تحجب عن اجسادهم الطرية اشعة الشمس الضارة غفت قليلا بحضن الريح دغدغ مسامعها هاتفا محملا برائحة النخيل عودي فما زال كلكامش حيا يقاتل الاعداء من اجل عفتك ويحن لرغيف خبز من تنورك الطين .. الوطن يا بلقيس ليس فندقا تغادرينه متى تشائين ؟!!

حكايتي مع موسى بن جعفر عليه السلام

في بعض الاحيان يصاب الانسان بنوع من الاحباط واليأس عندما تغلق امامه كل الابواب والنوافذ وتصبح نهاية النفق المؤدية الى ذلك النور الضئيل من الامل ضربا من ضروب الخيال حينها يتملكه الضعف والوهن وقد يدب في نفسه القنوط في مرحلة من مراحل حياتي أنتابني هذا الشعور . عندما تكالبت عليه الدنيا بفيضها وغيضها وتلبدت سمائي بالكديم من الغيوم الثقال وأمطرت كل مصائبها في آن واحد حتى اصبحت فريسة سهلة تتناهشني انياب ذئاب العوز والفقر من جهة وسنين الحصار الضروس والعجاف من جهة احرى , وقتها كنت لا املك عمل ومسؤوليه عائلتي الكبيره ملقاة على عاتقي فعملت لفترة وجيزة بأجر يومي مقداره ثمانية الأف دينار اسبوعيا وهذا المبلغ كان لا يمثل شي بالنسبه لتلك الايام فأغلبه اذا ما كان كله يذهب كأجرة تنقلي من البيت الى موقع عملي غير اني كنت دائما احاول اقناع نفسي بأني أعمل ( بطالة مقنعة) ورغم كل هذا كنت متماسكا وقويا وراضي بقدري والحمدلله . الى أن جاءت اللحظة التي هزمتني وحطمت كل اصراري وتماسكي كانت زوجتي كثيرا ما تشكو من آلم تحت فكها الاسفل وبالتحديد تحت الاذن اليمنى وبمرور الايام تحول هذا الالم الى ورم . ولكوني لا املك أجرة الطبيب تقاعست مضطرا ومتعذرا لها بأعذار واهية بأن هذا الشي امر عادي وطبيعي وورم عابر وانصحها بأحذ البراستول والمهدئات الى أن وصل الامر بها لحد الاختناق وصعوبة التنفس مما اضطرني أن استلف بعض المال من اصدقائي المقربين والذهاب بها الى الطبيب عندها فاجئني الطبيب بأن هذا الورم قد يكون خبيث وخطير جدا وان اجراء عمليه من هذا النوع لا يجيدها سوى طبيب واحد بالعراق لكون هذا الورم قد اخترق عصب حساس والدكتور الذي يجري هذه العمليه هو الطبيب الخاص بـ عدي صدام حسين حينها استرجعت وقلت ( يارب انا وين وعدي وين ) غير ان الطبيب لما رأى تنهداتي وحيرتي اخذته الشفقة بي وقال هذا الطبيب استاذي ولي علاقه به وسوف اتصل به واشرح له وضعك لعله يعمل لك العملية طبعا هذا الكلام بعد سلسلة مراجعات وفحوصات طويله تحملت فيها ديون كبيره . صادف في نفس الزمن استدعائي لخدمة الاحتياط فبقيت متحيرا من يذهب برفقة زوجتي الى بغداد لمراجعة الطبيب المختص فكلفت اخوها للقيام بهذه المهمة وصادف ايضا ان يكون سفرنا في نفس الليلة لا انسى تلك اللحظات عندما تركنا اطفالنا لا اب يرعاهم ولا ام تحنوا عليهم كنت احمل من الهموم ما لايعلمه الا الله تعالى . وافترقنا عند وصولنا الى بغداد حيث ذهبت زوجتي واخوها الى مستشفى الكندي وانا توجهة الى مستشفى الله الى باب الحوائج عند الله الى مولاي وسيدي موسى بن جعفر صلوات الله عليه وما ان لا مست روحي الحضرة الطاهرة تساقطت جبال همومي كأوراق الخريف فأحتضنت شباك مرقده الطاهر فلثمته بعمق جرحي ومأساتي وفاضة عيني عند اعتابه وتكلمت معه ورأيته مبتسما في وجهي كأنه يقول لي أطمئن باذن الله تعالى ستاخذ مرادك . . لا اريد الاطالة والاطناب فبعد مراجعات استمرت شهرين والتوسل بالطبيب لاجراء العمليه لانه كان يخاف على سمعته ان تموت زوجتي بيده ويقال عنه انه فشل واخيرا اقتنع بأجراء العمليه واعطى نسبة 10% ان تبقى على قيد الحياة 99% ان تشل شلل تام اذا مابقت على قيد الحياة . الى أن جاء يوم اجراء العملية واتذكر جيدا انه نفس اليوم الذي انهيت فيه خدمة الاحتياط العمليه اجريت صباحا استمرت 6 ساعات وانا وصلت الى بغداد فجر اليوم التالي فكنت اول من ايقضت زوجتي من النوم قلت لها انتِ حية قالت نعم قلت لها حركي اطرافك فحركتهم قالت ( شبيك لا تخاف حضر عمليتي علي بن ابي طالب وهو الي اجراء العمليه) وفي هذه الاثناء جاء الطبيب المختص فصعق لما رأى اطرافها تتحرك وهي على قيد الحياة فجلس على كرسي قريب قال لها احكي لي ما جرى قالت ( عندما تم تبنيجي واخذتوني الى صالة العمليات كنت خائفة جدا فوجدت رجل قصير القامة واقف في باب الصاله قال لي لا تخافي انا امامك علي بن ابي طالب لقد جاءني ليلة البارحة ولدي موسى بن جعفر يبكي وقال لي ياجدي الامر كذا وكذا وقد جاءني فلان يسال الله تعالى بحقي لشفاء زوجته وانت ياجد اقرب مني الى الله تعالى واستحي ان ارده فاذن لي الله تعالى ان اجري لك العمليه .. ما رأيت يدك يادكتور الا معلقة في الهواء ويد علي بن ابي طالب (ع) التي تقوم بأجراء العملية !!) فبكي الدكتور بعمق ونهض من كرسيه واتجه نحو الكاظمية وقال : ياسيدي ويامولاي ياموسى بن جعفر السلام عليكم ورحمة الله وبركاته برغم اني ليست من شعتكم لكني مقرا بانكم باب الحوائج الى الله تعالى . . . )

الشعب الذي لا يمييز بين الحية والجرية . . لا يستحق الحرية ؟!!

يروى والعهدة على الراوي أنه في قرية نائية يعيش أهلها البسطاء على مهنة الفلاحة والصيد وكلهم أميين لايحسنوا القراءة والكتابة ويعيش بينهم رجل يدعى ملا حسن أتخذ الدين غطاءا لجهله وأميته وصور نفسه للقرويين بأنه يقرأ ويكتب ويفهم في أصول الدين والفقه ولجهلهم صدق القرويون وتكفلوا بمسكنه ومأكله ومشربه وبقية أحتياجاته (نايم برأس الجماعة) وفجأة طرق سمع ملا حسن خبرا يفيد بأن الحكومة عازمة على ايفاد معلم لغة عربية إلى تلك القرية لتعليم ألأطفال وثارت ثائرة ملا حسن وجن جنونه وشعر بأن وصول المعلم الى القرية يعني نهاية لدجله وخداعه لأهل القرية وضربة قوية لمصالحه وأخذ يضرب أخماس بأسداس ويفكر ويتربص ويحيك المؤامرات حتى وصل لفكرة وحيلة خبيثة يتخلص بها من المعلم القادم من المدينة . ووصل المعلم وأستقبلته القرية وذهب مباشرة لمضيف شيخ القرية وفرح به كبار القوم وأستقبلوه أستقبالا لائقا وكان من ضمن المستقبلين ملا حسن..! وبعد أن تعرف المعلم على رجال القرية وأخذ يحدثهم أحاديث للمجاملة وعن التعليم والقراءة والكتابة تشجع ملا حسن وأستجمع قواه وبادر المعلم بسؤال استفزازي لم يدر في خلد الأستاذ فقال: أستاذ آنا على يقين بأنك لاتجيد القراءة والكتابة ! وأتحداك أن تكتب كلمة حية (افعى) فذهل المعلم من طلب ملا حسن وأعتبر أن الأمر سينتهي لصالحه وقبل التحدي وأحظروا لهم ورقتين وقلمين لكليهما، وبدء المعلم يكتب حية وكذلك قام ملا حسن بكتابة حية!! وبعد الانتهاء من الكتابة قدم الأثنان ورقتيهما الى رجال القرية وأخذ القوم يتدارسوا ويتباحثوا عن من كتب كلمة حية بشكل الصحيح وبعد فترة قرر أهل القرية بأن حية ملا حسن كتبت بالشكل الصحيح وأن حية المعلم لاتمت الى فصيلة الأفاعي بصلة ! فهجموا على المعلم وأشبعوه رفسا وركلا ( وبهذلوه) وطاردوه حافيا خارج القرية وشكروا ملا حسن على انقاذهم من شر المعلم وزادوا عطائه وأكرموه أكثر من قبل . ياترى ماذا فعل ملا حسن لكي تحضي حيته بأعجاب القرية وتفوز فوزا ماحقا على حية المعلم؟ المعلم وبحسن نية كتب حية كتابة أما ملا حسن فرسم خط متمايل على شكل حية!! وبما أن أهل القرية كلهم أميون لم يفهموا كلمة حية المكتوبة بيد المعلم بل حية ملا حسن كانت أقرب لعقليتهم بأعتبارها رسم يشبه الحية وهكذا نجا ملا حسن وحافظ على موقعه في القرية واستمر في خداع السذج . . !!؟

واليوم ملا حسن يعتلي أعلى المناصب الحكومية ولازال يستخدم نفس النقش الذي رسم فيه الحية ايام زمان لرسم مستقبل البلد بخطوط ملتوية ومتداخلة فيما بينها صفراء فاقع لونها تسر الناظرين تحضى بهتافات التأييد من حناجز الجماهير ( بالروح بالدم نفدك ياملا حسن) وعواصف تصفيق المصفقين الحارة من لدن شعب الاميين . أما المعلم المسكين الذي كاد ان يكون رسولا فقد افترش الرصيف بحاجيات اكسباير ورفع صوته مناديا ( الحاجه بربع ) . .!؟

فالشعب الذي لا يقرأ ولايكتب يودع طاغية ويستقبل ظالم يبدل عالم بجاهل االشعب الذي لا يمييز بين الحية والجرية . . . لايستحق الحرية 

((الشعب الذي ينتخب الفاسدين والانتهازيين والمحتالين والناهبين و الخونة، لا يعتبر ضحية، بل شريكا في الجريمة".جورج أورويل ))

نشرت في جريدة الزمان العدد 4959 في 24/11/2014

مذكرات جدتي نوفــه :

جدتي نوفه عدهه سوالف ما ادري شلون گايله وحچيهه كله فشگ بس احچياتهه حليوات ومرتبات وايطحن دوه عل الجرح هذاك اليوم گاعدين انباوع عل التلفزيون طلع واحد مصرگع يحچي( علساس محلل سياسي) ما عاجبته الحكومه ولا عاجبه المتظاهرين اللي ايطلبون بحقوقهم ولا عاجبه الدين ولا عاجبه ابو البلنگو اريد افتهم شيريد ما گاعد افتهم .. جدتي گالت جده هذه شيگول گلتلهه حبوبه عوفچ منه هاذ واحد يمضرط ومتيه صول اچعابه مثل اهواي ناس بهاذه البلد ايخوطون بصف الاستكان گالت حبوبه مثل هيچ بشر كون اصخريه وبعرج الاذن مثل اصخريت جدك حنش .. شوف حبوبة بيوم من الايام من چنه بقرية الدسيم جدك حنش چان گبل ما يچلچل الليل ازهبله عشاه وهذاك اليوم سويتله عشه توله وشنينه وگوگلله تعشه وصله وطلع سيار وي ربعه لمضيف الشيخ مثل كل مره بهذيچ الليله جدك بطاه اهواي چان من عشيات يرجع للبيت جزه نص الليل وجدك مامش وانا گتلني الوهواس وظليت بس الوجن يامن تجيبلي ارجيلي وابو ابيتي گلتلهه حبوبه چان خابرتي عليه گالت من فلك فرك امنين عدنه بذاك الوگت مابايل (مابايل ههههه خوش؟ ) بعد جدتك ما طبگت عينهه النوم وگليبي يفرفح واهناك گبل مايطر الفجر طب جدك حنش علينه اهدومه امرعده وگصته تخر دم انا من شفته بلهحال صحت يبووووي عمت عيني عليك ياسباح الگلب يا بعد اروحتي ياهو المرعدك هيچ گال عل كيفچ يابعد طوايفي عل كيفچ لا تلطمين لا يسمعنه السلف وننشهر بين العربان تره الحمه ينوفه تجي منرجلين گتله چا عود شنو اللي سوه بيك هيچ گال واحنه گاعدين بمضيف الشيخ گال الشيخ يال ربع شلون تاليتهه وي الاقطاعيين احنه نتعب ونزرع ونشگه وهمه ياكلونهه بارده مبرده شنو رايكم بله طفر فرخ ممذور وما حسب احساب للناس الاكبر منه عمر گال ننعل والديهم گال الشيخ خوش من باچر تحزمو وخلي نطلع عليهم بقصورهم نهجمهه عليهم هجم رد وطفر الممذور گال بس ياشيخ ما نگدر انلاويهم عدهم اسلاح وحرس گال الشيج چا امشونه نستشير سيد محمد وهو ينطينه الشورالزين وهم طفر الممذور گال شنو السيد يفتهم احسن منه گال الشيخ چا عمي امشونه لصريفة مدلول ابو العرگ ونشوف شوره گال الممذور يا شيخ ما يجوز ناخذ الشور من سكير حرام ..عاد انا بعد ينوفه ما تحملت طگت روحي گمت وبالصخريه وبعرج الاذن ووين اليوجعك گتله يا چليب يا ابن الچليب وتاليتهه وياك ووي امثالك مو السلف انعل والديه وانت كلساعه مطلعلك من راسك رأي

هسه احنه احتارينه وي هذا النفر الضال ساعه يگول الحكومه حراميه وباگو الشعب ومن تطلع عليهم الناس تظاهر ومعرضه حياته للخطر حتى تزيح هاي الحكومه گال هذوله جماعة فلان وطلعو من اجل مصالحهم بس فهمني شتريد .. اصخريه بعرج الاذن

لو ضاگ خلگك اذكر ايام عرسك :

ام ستوري جوارينه لگيتهه صافنه ومخليه ايدهه على خدهه وكلش ضايجه گلتلهه شبيچ خاله ليش ضايجه گالت يمه ما تشوف الدنيه شلون صارت ووين چانت فحبيت ألطف الجو شويه واتشاقه وياهه گلتلهه يگولون لو ضاگ خلگك اذكر ايام عرسك گالت اي يمه الف رحمه على والديك ذكرتني بالذي قضى ومضى ااااي شلون يوم چان يوم عرسي من صبح الله اخذوني للصالون عود يسون شعري وياي خواتي حميده وسعيده وفريده وبنات الجيران وچان يطلع ابو الصالون فد واحد حقير گال ما اسوي شعرچ الا اطلعون مسيره هسه وتهتفون بالروح بالدم نفديك يا صدام وهله بيك هله وبجيتك هله امرنه لله طلعنه وبعد ما هتفنه بالشارع ورجعنه للصالون ابو الصالون گال لعد نسيتو تگولون صدام اسمك هز امريكا يالله طلعو من جديد وطلعنه مسيره وصحنه صدام اسمك هز امريكا عاد گلت اخاف هذا يرجعنه بعد ويگول لعد بس امريكا خلي نگول كل الدول المعاديه للعراق وگمنه نصيح صدام اسمك هز امريكا وبريطانيا وايران واسرائيل والبرازبل والغابون وغينيا ورجعنه مره ثانيه للصالون چان ابو الصالون گال لعد و بيركينو فاسو ما هزهه لعد كل هذا الهوى منين طلع غير هو هزهه المهم بعد ضيم وضلايم سويت شعري وبعد ما خلصت كل الدول على الكره الارضيه الي هزهه صدام .. انوب اجه وقت الحفله مال العرس كل المنطقه اجت للعرس وطبعا لازم يعلگون صور القائد الضرورة بلبيت والا راح نگضي شهر العسل بالشعبه الخامسه المهم اشتغل الدگ ورگص حتى السيد مال منطقة العريس رگص رگصة بحيرة البجع ويه الشيخ مال منطقتنه والناس تهوس اخوان سنه وشيعه هذا الوطن ما نبيعه بعدهه اجت سيارات الزفه وزفوني بسوبر كراون 82 واهلي واهل المنطقه متونسين ويهوسون فوگ المليون حطو مية ..هذا مهر العظيماوية .. ياناس طفو الگلوب خدها يشع وية الروب .. ام ستوري يا چكليته حامض حلووو اباكيته . . وچان تضحك ام ستوري من كل گلبهه گالت الله يجازيك خاله ذكرتني بيام عرسي بس يمه فدوه اروحلك شنو الي اتغير بوضعنه ؟!. . گلتلهه خاله ام ستوري كلشي ما اتغير چنه عايشين برعب وخوف وظلم وحصار بس عالاقل ماچانت عدنه طائفيه وچان عدنه حراميه صحيح بس مو مثل هلوكت گلهم هتليه يا خاله تره كل اللي صار صدام نزع ملابسه العسكريه ولبس عمامه اسلاميه

حجّي لگو :

نسخة منه الى : قداسة الكهنوتية الشيعية والسنية

مللنا منكم ومن خطب جمعكم التي لا تهش ولا تنش ولا تنصر مظلوم ولا تعيد حق كل ذي حق فقولوا لي ماذا أستفدنا منكم غير الهرطقة الغوية والسفسطائية الكلامية .. أما غسل الجنابة فأهل مكة أدرى بشعابها ونساءنا تعلمن من أمهاتهن وجدتهن أحكام حيضهن ونفاسهن .. أولستم من يدعي الانتماء الى محمد وعلي وعمر ؟! .. أولست هولاء لم يغمض لهم جفن وفي رعيتهم مظلوم ؟ فأين أنتم من هولاء وكيف تنامون قريري العين آمنون والشعب العراقي بأكمله مظلوم ؟! لقد مللنا من حجّي لگو

وحجّي لگو هذا في سنه من السنين قرر يروح للحج وقبل ما كان اكو وسائل نقل مثل هليام فأشتره اجلكم الله حمار 8 سلندر هو صحيح مستخدم بس نظيف وكامل المواصفات المهم لملم چولاته واغراضه وخلاهم عل الحمار ومن صبح الله ودع عائلته ووصاهم وتوكل على الله متوجه لبيت الله الحرام لأداء فريضه الحج ومن وصل للحدود وگف بالسره بنقطة التفتيش وبعد ما فتشه الشرطي لگه عنده مسجل ومسدس وبطل عرگ زحلاوي ؟!!

گالوله ...شنووو ذني شسوي بيهن. ؟؟؟

گلهم عمي انا رجال چبير بالعمر ومابيه حيل اگول لبيك اللهم لبيك فسجلتهه بهاذه المسجل ومن اوصل اهناك اشغل المسجل وهو يگول بمكاني لبيك اللهم لبيك ( يعني مثل هليام من يخلون سماعه باب المحل تصيح الحاجه بألف الحاجه بألف كلشي داخل المحل الحاجه بألف )

گلوله زين والمسدس شسوي بي ؟؟؟

گلهم مو من يرحون يرجمون الشيطان برمي الجمرات تدرون انا ما بيه حيل اشمر حجار فأسحب اقسام اصمطه ب 7 طلقات وافوخ گلبي ( هم بيهه وجهة نظر!!!!!!! )

بس العرگ شسوي بي حجينه ؟؟؟

گلهم مو انا مثل ما گلت رجال چبير بالعمر وعندي سوفان ما بيه حيل اطوف حول الكعبة 7 اشواط فاطگلي بيك ساده الكعبة هية تجي تفتر حولي !!!

رباط السالفه ياجماعة ليس المساس بتعاليم السماء واحكام الله تباركت أسمائه ولكن ؟!!

هذه الايام كثر المتفيقهون والكهنوتية المقنعين بجلباب الدين والدين لعق على ألسنتهم يحوطونه ما درّت معائشهم فإذا محّصوا بالبلاء قلّ الديّانون

العراقي زايــــر مناتي . . .؟!

زاير مناتي مواطن عراقي لم يذق للراحةِ طعماً ولم يعرف للسعادةِ لوناً منذ الصرخة الاولى التي اطلقها يوم ولادته ولحين لفظ انفاسه الاخيرة .. ورث العذاب اباً عن جد من زمن نبوخذ نصر وقصة حزنه مكتوبة باللون الأسود في مسلة حمورابي لا لشيء فقط كونه جاء للدنيا رغم أنفه وشهادة ميلاده مختومة بختم عراقي . . زاير مناتي ( فد يوم حچالي احچايه گال بويه لا تصدگ كلمن راح لبيت الله وصاح لبيك اللهم لبيك مقبوله حجته فالبعض يرد عليه الله لاهله بيك ولا هله بجيتك .. گلته ليش زاير گال ابني سامع بقصة حجي واوي گتله منهو هذا حجي واوي گال چا اذا ما سامعهه بويه خلي اسولفلك القصه بس ابني افتح اذاناتك زين واعرف شنهو من هاي القصة غايتي : بيوم من الايام كان اكو بالقرية واوي بعد ما شبع من اكل الدجاج قرر يتوب وحلف يمين يروح يحج ويستغفر ربه عن ما اكله من دجاج الوادم بالحرام ويبطل بعد ما ياكل دجاج الناس الفقره راح حج وهو بطريق العودة راجع من الحج بالبلم شاف ديچ ودجاجة واگفين على جرف النهر أيريدون يعبرون للصوب الثاني من النهر وما يگدرون ومن شافهم الواوي گللهم تعالو أعبركم گله الديچ ابو الويو أنخاف تاكلنا الواوي حلف اغلظ الايمان الله وكيلكم توني جاي من حج بيت الله وتايب الديچ گلبه لعب وما صدگ لان يعرفه كلاوچي وبقى خايف بس الدجاجة ومثل باقي النِثايه گلبهه رچيچ تقشمرت بالعجل وصدگت بحچي الواوي وظلت تلح منا الى ان قنعت الديچ مثل ما قنعت امنه حواء ابونه ادم وطلعته من الجنه المهم ركبو البلم وي الواوي حتى يعبرهم النهر وبنص النهر حس الواوي بالجوع والسعابيل گامت تخر من حلگه وحس الديچ بالخطر فالتفت على الدجاجة وشاورهه گلهه هاااا يابت مشعول الصفحه (طبعا مو صفحة الفيسبوك) مو كتلچ هذا ما يتأمن ولا تامنين بيه وتره ابو طبع ما يجوز من طبعه وماشاف الا الواوي فجاة يگمز على الدجاجة ويخمطهه ويرمرمهه ترمرم ..اما الديچ فگال ويه روحة (ياروح ما بعدچ روح ) الموته بالماي ولا بطن ملعون الوالدين الواوي وطفر من البلم للنهر ومات شهيد كلاوات حجي واوي ؟)

قسمة فنيخ :

فنيخ شخصية موروثة  لم ألتق  قط لا على أرض الواقع ولا حتى من خلال الشبكة العنكبوتية (الانترنت) فكل ما أعرفه عنه أطراف أحاديث نقلها لنا الموروث الشعبي العراقي أباً عن جد .. فالرجل كان قروي انتبذ من أهله مكاناً قصياً وأتخذ من إحدى قرى الاهوار النائية في مدينة العمارة مسكناً وملاذاً آمناً وآثر على نفسه العزلة تلافياً لما يسببه له الاختلاط بالناس من مشاكل .. كان حكيم لقماني رغم انه لا يفقه من فلسفة سقراط شيئاً بل وانه لا يتمكن من تلفظ كلمة الفلسفة دون تلكأ .. وعارف بالعدل الإلهي على الرغم من انه لا يستطيع ان يميز بين حرف الألف والياء فقد أدرك من نمو وتكاثر قصب البردي في الهور من دون تدخل للإنسان فيه حكمة العدل الإلهي .. ذات ليلة زمهريرية من ليالي الهور الباردة والمظلمة طرق بابه ضيف فرحب به ووقر مقامه أكثر من غيره كونه (سيد) فذبح له دجاجته الوحيدة التي كان يملكها وطلب من زوجته أن تصنع لهم وجبة العشاء وبعد ان نضجت الدجاجة قدمها بين يدي ضيفه .. وقال له (معتذراً عن التقصير): سيدنا هذه الدجاجة كل ما أملك وكنت استفاد من بيضها كل صباح ولو كنت امتلك أكبر منها لقدمته لك .. فهل تحب أن نقتسمها بيني وبينك بقسمة فنيخ ام بقسمة الله فتأمل السيد الأمر وضرب أخماس بأسداس وبعد تفكير طويل ومتأنِ قال: دعني ارى قسمة فنيخ اولاً فأخذ فنيخ سكيناً وقطع الدجاجة الى نصفين متساويين فدخل الى نفس السيد طلب المزيد ولمع في عينه الطمع فقال : لا أرضى بقسمتك فأقسم الدجاجة بقسمة الله فأخذ فنيخ نصف السيد وضمه الى نصفه ولم يعط السيد غير الجناح ! فنهض السيد منتفضاً ثائراً يصفع جناحي عباءته بعضها بالبعض الاخر وقال مغاضباً : أنه امر دبر بليل أيها الزنديق فهل أنت أعدل من الله ؟ بكل هدوء أجابه فنيخ ألا ترى أنك تملك عمارات وقصور وعقارات ومزارع في كل دول العالم وتركب اخر موديلات السيارات وتلبس أجمل الثياب وتعتلى أعلى المناصب بالدولة وتدعي انها هبة الله لك ولم يهبني سوى هذه الدجاجة وأرسلك لتشاركني بها .. ألست هذه قسمة الله الذي شرعتها لنفسك ؟! وما أنزل الله بها من سلطان .. في الحقيقة كنا نتوسم خيراً بعد سقوط الصنم وزوال ظلم الطاغية صدام إن تنصفاً وترفع عنا الحيف عدالة السادة والذي كان من المفروض أن تكون امتداد لعدالة الإمام علي (ع) لكن للأسف الشديد خابت بهم الظنون .. طبعاً كلامي موجه للبعض .. هناك سادة أجلّاء فلهؤلاء النفر ترفع القبعات إكراماً وتنحي لهم الهامات إحتراماً وتقديراً .. وفي النهاية شعب فنيخ ينطبق عليه المثل القائل : (لاحظت برجيلها..ولا خذت سيد علي)

ثلثين الولد على خاله :

هذا المثل من الأمثال الشعبية والمتداولة كثيرا في العراق ويضرب عندما يكون الخال رجلا محترما يشار له بالبنان والأخلاق الحميدة وتظهر هذه الصفات في تصرفات وأخلاق ابن أخته أو على العكس من ذلك تماما. فنجد الاولاد أكثر شبة وأكثر تعلق بأخوالهم . هذا ما يخص الإنسان . أما مسألة ادعى البغل بأن الحصان خاله وأدعى النغل من جهة أخرى بأن الحمار خاله مسألة فيها نظر. الحقيقة البغل حيوان هجين ينتج عن تزاوج فرس مع ذكر الحمار فيما النغل هو حيوان هجين أيضا من سلالة الخيول وينتج عن تزاوج الحصان وأنثى الحمار وتتميز البغال بتمتعها بصبر الحمار وقوة الفرس فضلا عن مقاومتها للأمراض وقوة عضلاتها وسرعة حركتها ما يشجع على استخدامها في حمل الأثقال في المناطق الجبلية ذات المسالك الوعرة. وتتصف البغال ايضا بالعناد ويقال إنه عندما يقسو عليها سائسها وهي سائرة في أعالي الجبال ترمي بحملها وتنتحر رامية بنفسها من فوق الجبل. اما النغل فيستخدم أيضا للركوب وحمل المتاع. ويفترق النغل عن البغل بأنه أصغر حجما وأقل قوة من البغل. ويذكر أن البغل والنغل عقيمان ولكليهما أحقية الانتساب الى خاله. أما أنا فكل ما يعنيني من هذه المقدمة المطولة شيئا واحدا لطالما أرقني وأخافني حصوله فهل من الممكن أن يتحول في يوم من الأيام البغل أو النغل زعيما ؟!! وللأسف الشديد يقال انه حصل ولازال يحصل في تاريخ زعامتنا العربية الماضية منها والحالية مثل هكذا تحول. وعليه وجب على الأقلام المثقفة تحذير الأمة من خطورة تسلل البغال والنغال إلى سدة الحكم واعتلاء قمة هرم السلطة. فعندما يصبح جلالة الملك بغلا تختل الموازين وتتداخل العناوين بعضها في البعض الأخر فيصير الجمال قبحا والمعروف منكرا والنهيق غناء وزقزقة العصافير هي أنكر الأصوات وستجد البلابل تتوقف عن التغريد خشية أن تتهم بتنشيز السلم الموسيقي. وسترى الفكر البغلي منهجا فلسفيا يدرس في أعرق الجامعات إلى جانب منهج الشك لديكارت ويقارن بفلسفة الوجود عند أفلاطون وسترى أساتذة الجامعات يحاولون إظهار أكبر قدر ممكن من الحماقة والغباء لكيلا تنالهم عقوبة الإساءة للذات البغلية أو محاولة تغيير عقيدة البغال. عندما يصبح سيادة رئيس الجمهورية بغلا تصبح حيازة العقل جنحة واستخدامه جناية وتعظيمه خيانة عظمى عقوبتها الإعدام ستجد الشعب يقبل سياط الذل والهوان وكل الاهانات والتنازل عن كرامته الإنسانية أمام الزعامة البغلية وكل ذلك مقابل حزمة من البرسيم آخر الليل. سيقبل الناس بالشيء وعكسه في الوقت نفسه فتراهم يصدقون الأمر ونقيضه، ويتذمرون على الشيء ثم يخضعون لما هو أسوأ منه لأنهم قبلوا أيديولوجية البغال. عندما يصبح سمو أمير البلاد المفدى بغلا ستجد البغل في هيئة وزير وفي هيئة أستاذ جامعي وتراه مديرا وطبيبا وشاعرا ومثقفا وإعلاميا وفنانا وعبقريا و و و و وحتى في أخر المطاف في هيئة خفير والأدهى والآمر ستجده إمام جمعة يخطب ويفتي بأن الله خلق البغال في أحسن تقويم. حين يصبح الحاكم العربي بغلا او نغلا ستجد اي إنسان مسكين لا يتجرأ الإعلان عن آرائه بهذا الكائن الحقير وإلا تعرض للاعتقال والسجن ولربما في أخر الأمر مقتولا أو شهيدا في سبيل فكرة تقول :(أن الله خلق الإنسان وكرمه على سائر المخلوقات بالعقل وقد يتسافل هذا الإنسان إلى مرتبة جلالة الملك أو سيادة الرئيس أو سمو الامير) ؟!!اللهم لك الحمد والثناء إن خلقتني انسانا سويا ولم تخلقني ملكا ولا رئيسا ولا أميرا فأقبضني إليك كما ولدتني أمي أنسانا حرا

لو العب لو اخرب الملعب :

سعود أبن حجي فيصل شاب (فايخ) ينتمي الى عائلة (زنگيلة) من الطبقة البرجوازية حيث كان ابوه سركال قرية معظم سكانها يعيشون تحت خط الفقر (شابعين ضيم وضلايم). ابناء هذه القرية يحبون ممارسة لعبة كرة القدم والوحيد الذي يمتلك كرة (طوبه) سعود ولأن سعود ولد وفي فمه ملعقة ذهب أعتاد من اسرته البرجوازية نظرة التعالي واحتقار الاخرين وكان يشترط على شباب القرية إذا ما طلبوا منه اللعب بكرته شروط صارمة (يتعيقل بروسهم) وكان الامر الناهي والكل بالكل فتراه تارة يوزع ادوار اللعب على مزاجه ولا يسمح للأخرين ان يسجلوا اهداف (اگوال) الا بعد اذن منه وعاثر الحظ من تسول له نفسه مراوغته بالكرة فبدون نقاش مكانه دكة الاحتياط. وتارة اخرى يتقمص دور الحكم والويل كل الويل (يصمط أبو أبوه) لحارس المرمى (الگولجي) إذا تصدى لركلة من ركلاته حتى وان كانت ركلة ضعيفة فمصيره دون أدني شك ان يشهر بوجه الكرت الاحمر ولا يسمح له باللعب في تتالي الايام. الى ان بلغ به الامر ان يغير قوانين الفيفا. ضاق أبناء القرية ذرعاً من تصرفاته اللاأخلاقية وللاإنسانية (ملوا من سوالفه التعبانة) وقرروا ان يضعوا نهاية لهذا الاذلال غير المبرر فاتفقوا وتوحدوا على كلمة واحده (يعوفوه وما يلعبون بطوبته) وفي اليوم التالي جاء سعود وكعادته (نافخ ريشاته عالوادم ولابسهم ) ولكن أحداً لم يقبل أن يلعب معه فاغتاظ منهم وبدأ يلعب لوحده وضرب الكرة مراراً وبدأ (يلعب تك گول) بدون حارس مرمى وحين وجد نفسه وحيدا (انلاصت السالفة) وان كرته لا قيمة لها دون مشاركة الاخرين معه باللعب رجع الى جماعته وقال لهم (ليش ما تلعبون وياي ؟) فقالوا له: (نلعب ... بس حالك حالنا مو تتعيقل بروسنا وعالسنة ومو تلعب بكيفك تطرد وتنطي ضربات جزاء ضد المساكين وتگوّل من الأوفسايد ولاعب لعب بقوانبن الفيفا) أحس سعود بالانزعاج للوهلة الاولى ولكنه رضخ للأمر الواقع فيما بعد حين عرف بأن (طوبته ما تسوه فلسين) إذا لم يكن هناك من يلاعبه وان الايدي إذا ما توحدت ضد الظلم والتغطرس واصبحت يدا واحدة هزمت كل اشكال الرق والعبودية فرضى (بالمقسوم) واحترم نفسه
أعتقد ياجماعة فهمتو قصدي من سالفة سعود ابن السركال وطوبته؟ مثل ما تعرفون كرة القدم لعبة جماعيه فاذا ما توفرت فيها روح الجماعة تحقق الفوز والنصر لا محال فمن فلسفة كرة القدم ومن حكاية سعود يجب ان نتعلم ان نكون يدا واحدة بوجه عدونا المشترك وننبذ كل اشكال الطائفية والكراهية وان ننظر للعراق على انه وطن الجميع مو كلمن يدعي هو ابو العراق راح يضيع من بين ايدكم العراق وتكونون عبيد وخدم تايهين بالدول. ارجعوا الى اصلكم وغيرتكم العراقية ارجعوا الى ايام اباءكم واجدادكم يوم كان لا يعرف المسلم من المسيحي ولا الشيعي من السني ولا العربي من الكردي اصحو من نومتكم فكل من حولكم اعداءكم أعلموا ان داعش لا تمثل لا من بعيد ولا من قريب روح الاسلام ضعوا ايديكم بأيدي بعض لان عدوكم لا يفرق بين مذهب واخر ولا بين دين ودين فكل همه القضاء على العراق بأي شكل من الاشكال ((يا قوم أنى أخاف عليكم مثل يوم الأحزاب مثل دأب قوم نوح وعاد وثمود والذين من بعدهم وما الله يريد ظلما للعباد)) . . . اللهم أنى بلغت اللهم فأشهد

سيمفونيه دخول الجنه ؟!

دللول المعزوفة الملائكية التي اقتطعت خلسة من ألحان السماء والمقطوعة الموسيقية التي عجزت عن توليفتها كل الأوركسترا في العالم .. ترنيمة لا يحلو لها الترنم إلا من بين شفاه عجن أديمها بأنهار عسل الجنة .. ترنيمة لطالما دغدغت شغاف القلوب قبل أن يلامس شجاها همس الإسماع والمقبلات المشهية (وضحكات الغزيلات) قبل كل وجبة رضاعة .. دللول ذلك العزف المنفرد واللحن الشجي الذي أبحرنا من خلال كلماتها في بحر لجي من الحنان المتلاطم والمشاعر الجياشة لتغفو بملأ السكينة والطمأنينة أروحنا المتعبة في غبطة وهناء والسعادة التي تشعرنا دوما بأن هرمون السعادة حقيقة علمية لا كما تصورنا بأنه نظريات وافتراضات فاقدة لأهليتها على أرض الواقع .. دللول هذه المفردة المتجذرة في الأصالة والمنحدرة من ذلك الزمن الموغل في القدم لازال حق ملكيتها حكرنا على مسامعنا ذلك الحق الذي يدعونا (عندما كنا صغارنا) إلى تصنع البكاء من آجل أن تعود تلك الحنجرة الملكوتية تصدح به من جديد إذا ما أنقطع لأي سبب من الأسباب .. دللول الكلمات المملؤة بالشجن الملحون التي تهدهدها الأم لرضيعها الصغير وهي منقطعة عن أي شيء وسابحة في فضاء واسع من الهموم والإحزان والهمهمة المبهمة بلا حدود كأن شيء مجهول كدر عليها لذتها بصغيرها وتوجسا ما قد سلبها نشوة أمومتها مع وليدها .. في حينها لم ندرك هذا التوجس ولا نعي نبوءة الأمهات كانت تمر كلمات هدهدتها علينا مر الكرام واليوم بعد أن كبرنا واستقراءنا الواقع أدركنا ذلك الهاجس وفقهنا النبوءة التي كانت تعنيها (عدوك عليل وساكن الچول). لسان حالها يحذرنا بطش وجبروت ذلك العدو المجهول والذي تصفه بالعليل كي تخفف من وطئت تجبره من جهة وان لا تثني شكيمتنا ولا تكسر إرادتنا في مقارعته من جهة أخرى .. في الماضي (عدوك) كان معروف الهوية والأسلوب واليوم يا أمي ظهرت ملامح ذلك العدو العليل وفهمنا ما كنتِ تعني بالعليل .. فهمنا بأن عدونا منا وفينا كالعلة الخبيثة التي تنهش الجسد المعتل وهي جزء منه .. اليوم دللول كتمت أنفاسها وقطعت أوداجها ونحروا وليدها بدم بارد وبسكين لم يمر على نصلها المسن .. دللول باتت أشلاء ممزقة في نهر الفرات من غير غسل ولا كفن .. دللول لم تمنحها الأيام فرصة واحدة من الفرح لتهنأ بصغيرها حتى يكبر أمام ناظريها ويكون (ذخر ليام شبي) فقد ارتدت ثوب حزنه الأسود مبكرا وهو لازال بالقماط .. دللولكِ يا أمي حرمت من عناق جسد وليدها وحرمت حتى من وداعه وشمه ومنعت من أن تنعى عليه (يمه يوحيد ياضوه العين انا من بعدك انطي الوجه ليوين). . رحمك الله يا أمي ورحم دللولكِ برحمته الواسعة ورحم طيبة قلبكِ الطاهر الذي لم يفكر يوما بأن (عدوك عليل وساكن الچول) بالحقيقة هو عراقي الجنسية يسكن الضفة الأخرى من الوطن

صفگ يحميد يمه :

للتصفيق فوائد جمة قد لا نعلم كل خفاياها ومزاياها وقد يحسدنا عليها الكثير من المخلوقات الاخرى .. فالتصفيق أفضل وسيلة لقطع ثرثرت الدكتورة حسنة ملص عندما تعتلي المنصة وتتحدث عن الشرف والشرفاء والتصفيق يوفر إمكانية تقليل كمية الكذب المهدور ويقلل كمية اللعاب (التفال) المتطاير من الافواه العفنة ويختصر الطريق على التعتعات والمتمتات ويمنح اللسان برهة من الزمن ليتوقف عن النفاق كما ان التصفيق يبعد (البگ والحرمس ) عن وجوه المصفقين والقطط دائما ما تهرب من عاصفة تصفيق المصفقين وينشط الدورة الدموية ويمنع الجلطات الدماغيه والذبحات الصدرية ويحسن جهاز المناعة ويرفع من نسبة الأوكسجين الصاعد الى الدماغ والنازل الى البروستاتا وكثيرا ما يتغزل (المطيرچيه) بطيورهم عند التصفير والتصفيق وتتراقص الارداف والاكتاف على أنغام تصفيق المصفقين .. من هنا ولهذه الفوائد أدعوا ابناء الشعب والجماهير الكادحة أن تستمر في التصفيق حتى تستطيع أن تخلق فئة جديدة من الخطباء والسياسيين الذين تناطح شهرتهم عنان السماء ولا يفقهوا سوى القاء التحية على الموجودين والضحك على ذقون الحاضرين :

إذا تحدثوا عن النزاهة والنزيهين . . . صفقوا لهم !!

وصفقوا لهم إذا نسوا أنفسهم وتحدثوا عن الفساد والمفسدين !!

إذا وعدوكم بالماء والكهرباء وتبليط الشوارع وحياة خالية من الفقراء صفقوا لهم!

إذا وعدوكم بالإصلاح صفقوا لهم !!

وصفقوا لهم إذا لم يعدوكم بشي !!

إذا سرقوكم بأسم الوطنية والدين صفقوا لهم !!

صفقوا لهم إذا باعوكم في سوق النخاسين !!

إذا ثرثر خطباء الفتنة من على منابر المسلمين. . صفقوا لهم !!

صفقوا لكل السياسيين والبرلمانين

صفقوا لكل المنافقين والسارقين

صفقوا لهم بكل ما أوتيتم من قوة إنهم أبناء الرب وانبياء مرسلين

أيعقل أن يسرق أبن الرب !؟ تالله إنكم لفي ضلالكم القديم

أنا والديك :

هاي صار كم يوم يوميه اروح للدوام متاخر واحتمال براس الشهر اطلع مطلوب للدولة لان كل يوم مسويلي عقوبة قطع راتب يعني ميزانيتي هذا الشهر مصفره وكل هاي المصايب من وره الديچ الله لا يوفقه چنت موظف نشط وشحلاتني اگعد من الصبح اسبح واتريگ واتشيك بس ما ادري منين اجتني هاي الطرگاعه السوده . . چنت متعود الساعة بـ 11 ونص انام .. وفد ليله من الليالي وانا بعز نومتي وچنت مشغل حلم رومانسي ما حسيت الا فد شي ثگيل جاثم على صدري وصوته اقوى من صوت F16 من تفتح حاجز الصوت عععععووووووو فهيه طفره هيه ردمه بالحايط واذا دمي بطولي صراحه انا ما همني اني انفشخت بس كلش انقهرت على روز خطيه خليتهه بوحدهه باتيتانك راح تغرگ لان چنت احلم انا جاك حبيب روز..عموما اجو العايله خطيه اسمالله اسمالله عبالهم نطحني الطلي لان عدنه طلي مربينه بالحديقة نطحته والگبر وبعد ما رجعلي وعيي وهدأت من روعي سئلت الجهال هذا الديچ منين اجه وشلون اخترق دفاعاتنه وتحصناتنه الاماميه گالو ماندري انا گالت هم عيب اسأل الديچ لان من عوايد العرب ما يسألون الخطار الا بعد تلاث تيام اشو خلصن التلاثه والاربع والاسبوع لا انا حچيت ولا الديچ شرحلي وضعه اخر شي طگت روحي ليليه يستلمني من الساعه ثنتين لوجه الصبح عوع ما عووووع هاي غير التچفص بطني واشياء اخرى ذو رائحة كريهه ما اريد اذكرها هذاك اليوم من صبح الله اخذت الديچ جوه ابطي وافتريت بيه الجوارين بيت بيت الى ان طحت بأهله گلتلهم عمي هذا الديچ الكم گالو ااااي الف رحمه على والديك صار اسبوع ندور عليه انعمله عليك سلمته الهم سالم مسلح وخالي من العاهات والامراض المسريه حمدت الله وشكرته گلت الليله راح انام قرير العين والحگ على حبيبتي روز خطيه لان راح تموت صار اسبوع تاركهه بنص المحيط المنجمد . . توني غمضت عيني ما حسيت الا F16 تعاود فتح حاجز الصوت من جديد لهنا بعد ماظل عندي صبر منا يوميه عقوبة قطع راتب ومنا البگ ماخذله صفحه والكهرباء المدلله تلعب علينه شيطي بيطي شگيت اهدومي وگمت ألطم وتناوشت مگوار ابوي الله يرحمه وسويت هجوم كاسح على جيرانه والجهال والمره وباقي الجوارين يركضون وراي وانا بطرگ الفانيله ام العلاگه واصيح اين تفرون مني يابيت ال ابا ديك اليوم اليوم دگت للنصر اجراس والجوارين يبوسون بيه يتوسلون يابه مو حلوه بحقك ابو هاني انت رجال فاهم وچبير وانا اصيح خلي يطلعون اليوم اسوي ما اسوي ( طبعا كلش حميت ) وخطيه الجوارين اصحاب الديچ قدرو وضعي وعصبيتي سدو الباب فانا ظليت گاعد بالباب الى ان طلعت جدتهم الچبيره گالت يمه محمد ابو هويني افه عليك شبيك تخبلت وسحبتني ودخلتني للبيت وجابتلي ماي بارد انا هم بردت اعصابي واستحيت من العجوز گالت يمه خلي اسولفلك سالفة هذا الديچ .. كنت انا وامك الله يرحمهه مثل الخوات انت چنت ازغير وامك تحب تربي دجاج بلبيت فبيوم من الايام گلتلهه خيه ام محمد اريد تنطيني كتكوت من دجاجاتج وانطتني كتكوت وربيته وكبار وهذا الديچ من احفاد ذاك الكتكوت ولانه اصيل ابن اصيل بعده يحن لوطنه الاول ويجيكم للبيت . . .!!؟

أحنا صف الأول . . أحسن الصفوف

بهذه الكلمات المعبرة استهل جدي حنش كلمته الغراء التي ألقها في المؤتمر التأسيسي لعصبة الامم عام 1920 . عندما كان يشغل منصب رئيس جمهورية أبي الخصيب الاتحادية . جدي حنش سياسي مخضرم (عتيج من ايام چان الچلاق باليد) مارس السياسة منذ نعومة أظافره أيام كان يلعب (غميضه جيجو) مع أبناء مدينتة (ابو مغيرة) التي أبصر فيها نور الحياة ونشأ وترعرع في ربوع درابينها الضيقة وشوارعها المحفرة تلقى علومه الاولية في مدارسها الطينية ونال شهادة الابتدائية بكل جدارة بعد عناء طويل وجهاد مرير في طلب العلم حيث امضى ثلاث سنوات رسوب متتاليه في الصف السادس الابتدائي . وهذه الحقيقة تدحض كل الشائعات وتلجم كل الابواق المزمرته بأنه شخص أمي لايقرأ ولا يكتب . جدي حنش وكما روى لي حكايته مع أول جلسة للمؤتمر التأسيسي لعصبة الامم حيث يقول: تلقيت دعوة رسميه عبر بريدي الالكتروني من السير إريك دروموند رئيس العصبة أنذاك بصفتي ممثلا وحيدا وحصريا لبلدي حيث تعتبر جمهورية (ابو الخصيب) احدى الدول الكبرى المؤسسة لهذه المنظمة العالمية فحزمة امتعتي وغادرت ارض الوطن على راس وفد رفيع المستوى يضم عدد من السادة الوزراء الاخ يعگوب (يعقوب) وزير حقوق الوادم وزاير يابر(جابر) وزير البريمزات النفطية والصوندات الهوائية وحجي بو عبد الرحمان وزير القراية والكتابه ومله فرهاد وزير الخردة الطره والكتبه . وبعد صلاة الصبح استأجرنا بلم عشاري وركبنا أمواج شط العرب من منطقة السيبة متوجهين الى نهر المسيسيبي عبر الاراضي الامريكية مرورا بالبحر الأدرياتيكي وانتهاءً بنهر التايمز ومن ثم حطت رحالنا أرض مملكة بريطانيا العظمى عند الساعة الثامنة صباحا حسب توقيت غرينيتش وكان في أستقبالنا جلالة الملك جورج الخامس حيث كانت حفاوة الاستقبال وكرم الضيافة منقطعة النظير وأطلقت المدفعية الملكية احدى وعشرين اطلاقة مدفع ترحيبا بقدومنا وبعد ان تناولنا وجبه (الريوگ) في قصر باكينجهام توجهنا مباشرة الى قاعة المؤتمرات برفقة جلالة الملك وسط عاصفة من التصفيق الحار والهتافات (بروح بالدم نفديك ياحنش) حينها لم أتمالك مشاعري فأجهشت بالبكاء وعلى مضض أعتليت المنصه الرئاسية وانا اكفكف دموعي والجماهير والحضور من كبار الشخصيات تهتف ( هذا الكاس يلمع والعيون تدمع ) فأومت بيدي للجميع ان اسكتو فسكتوا فبعد الترحيب بالحضور قلت : سيدي الرئيس من أجل رأب الصدع في المجتمع الأممي تحديدا وفي جمهوريتنا العظمى . من أجل تقيد تنامي النمو العشائري في المجتمع المدني الذي نريد . من اجل إلغاء الفوارق الطبقية بين الناس.وشطب الخطوط الحمراء والخضراء والصفراء من (الترفك لايت ) والقضاء على الفوارق المناطقية والطائفية والإقليمية والجنسية والبتيته والباميه والقرنابيط ونبع يا خيار والحگه بثلاثين . من اجل هذا وذاك وتلك والتي ولعل ولربما وكان واخواتها وكل ما قيل وما لم يقل وما لن يقال. من اجل كل ذلك أقترح على عصبتكم الموقرة تغير دوام القمر من الساعة الساعة السادسة صباحاً الى الساعة السابعة مساءً ( ليش بس الشمس مدلله شابعه نوم الليل كله وهذا المگرود الگمر ليله كله سهران ) أليس من الانصاف يرتاح شويه . . سيدي الرئيس هذا اقتراح بسيط لكنه عبقري ويحل كافة المشاكل التي نعاني منها وسوف تكون العشائرية في خبر كان والإقليمية في خبر إن والمناطقية عديمة اللون والطعم والرائحة والسلام عليكم ورحمة الله وبركاته والحمدلله على نعمة الايمان . .

الله يرحمك جدي جنش ( شكد چان عادل ومنصف)

مغامرات الفضاء :

جدي حنش . . الاسم الذي أرعب دوائر الاستخبارات العالمية والشغل الشاغل لوكالة المخابرات المركزية الامريكية (CIA) والرجل الوطواط كما يحلو لبعض وسائل الاعلام ان تنعته بهذا الاسم. في أحد الايام زار عيادة طبيب الاسنان لأنه كان يشكو (كما يعتقد) من الآم مبرحة في الصف العلوي من اسنانه المنخورة والآيلة للسقوط وبعد ان اجراء الطبيب الفحوصات اللازمة له تبين ان اسنانه صناعية (تركيب) وهي لا تؤلم ولاتلتهب !!. . جدي حنش كان كثير التوجع وله خيال واسع وخصب في نسج الروايات الوهمية لأمراض ليس لها حقيقة على ارض الواقع (اشكوكي) ففي احدى المرات عندما زارنا بعض الاقارب والاصدقاء للاطمئنان على صحته بعد وعكة صحية مفبركة. كان بهيئة المحتضر المودع فأومى بيده الى الجميع ان اسكتوا فسكتوا فقال بصوت ضعيف يا أولادي اني ارى الملائكة تحيط بي من كل حدب و صوب وتقول اقدم الينا ياحنش فالحور عين مشتاقة لعناقك وقبل ان افارقكم اروي لكم واحدة من بطولاتي ايام زمان فعندما كنت شابا يافعا عملت بالتهريب (قچقچي) وكنت شغفا بالمغامرة حتى ان الكثير من افلام الكابوي اقتبست قصصها من مغامراتي وذات مرة وانا اقود دراجتي النارية (الماطور سكل) المحملة بمواد ممنوعة(تمر زاهدي وباميا الديرة وحنه الفاو) وكنت انوي تهريبها الى ولاية شيكاغو عبر الحدود الكندية -الامريكية (چان اشوفلك دورية مشتركة لـ CIA والشرطة الفيدرالية الامريكية والكوماندوس ناصبين إلي كمين) لم اعبأ بوجودهم على الاطلاق وبضغطة زر واحده تحولت دراجتي الى (كرندايزر) ومزقتهم شر ممزق الى ان سمعت من مكبرات الصوت استغاثت الرئيس الامريكي آنذاك بوش الاب( فيغا الكبير) وهو يحمل الراية البيضاء معلن استسلام الولايات المتحدة الامريكية امام ضربات (دوق فليد) وهو يقول توقف ( داسكي) العفو اقصد توقف سيد حنش سوف نلبي كل طلباتك وعقدت معهم اتفاقية خيمة سفوان ( آه لو يعلم الشعب الامريكي على ماذا وقع بوش في اتفاقية خيمة سفوان لبكى بدموع من دم ) وبعد ان وقع بوش على ورقه بيضاء اصبحت امريكا ناحية تابعة لقضاء ابي الخصيب (كوكب فليد المسالم ) واصبح رئيس هذه الناحية من الهنود الحمر ورئيس وزرائها من البروتستانت ورئيس كونغرسها من الكاثوليك اما باقي حكومتها فهم من قطاع الطرق والمافيا . . والحمدلله على نعمة الايمان . . والله يرحمك يا جدي حنش(شكد چان شجاع)

ديك جدي حنش ؟!!

أعتدنا كل مساء نقضي ( التعلولة) في بيت جدي حنش . البيت الذي كان يجمع كل ابناء القرية صغيرهم وكبيرهم على الرحب والسعة في زمن خلت ايامه من التلفزيون والانترنت ومن كل وسائل الحداثة. لكنها ايام ملؤها الطيبة والغيرة والمحبة رغم جشوبة العيش ومنغصات الحياة .. الا ان شفاهنا لم تفارق الابتسامة قط .. جدي حنش كان بمثابة الحكواتي الذي عوضنا عن كل وسائل الاعلام وما تقدمه اليوم من سموم ومهازل لأسقاط شخصية الشباب من خلال الصور والالفاظ الخادشة للحياء .. ذات مساء كنا منتظرين لحكاية جديدة من حكايات جدي حنش فبعد ان اكمل شرب (استكان الچاي) ولف السيجارة كعادته في كل مره قبل ان يبدأ بسرد حكايته قال : ورثت عن ابي (زاير عفريت) ديك وكثيرا ما اوصاني بالعناية بهذا الديك ولا اعرف سر هذا الالحاح في التأكيد على هذه الوصية وبعد ان حان اجله وهو على فراش الموت يحتضر قال: ادنوا مني فدنوت منه قال: (يبه حنيش هلله هلله بالديچ) بعدها فاضت روحه الطاهرة بين يدي رحمه الله ولازالت كلماته ترن في أذني طبقت وصية والدي بحذافيرها غير ان هذا الديك كان ديك شرساً ومزعجاً جداً ظالما وطاغية لا يرحم ديوك القرية فكان الكل يهابه ويخاف منه . في أحد الايام طرق بابي جاري العزيز شاكياً من ديكناً المراهق المزعج قائلا: لقد حول هذا الديك حياتنا الى جحيم بسبب صياحه فليس له وقت معتاد (يعوعي بيه) فقد افزع مضاجعناً ( طير النومه من عيونه) فقلت له ( ما يكون خاطرك الا طيب جاري العزيز) وفي اليوم التالي ذبحت الديك مخالفاً وصية ابي رحمه الله وعزمت جاري عليه وبعد الانتهاء من الوليمة قلت لجاري بعد اليوم لن تسمع ديكي (يعوعي) ويزعجك لأنه للتو اكلنا لحمه هنيئاً مريئاً .. فشكرني جاري وقال سوف انام الليلة قرير العين وفي صباح اليوم الثاني طرق الباب وإذا بجاري العزيز يشكو من عدم النوم قلت ما بك؟ قال (لو ظالين على ديچك ارحم ) قلت لماذا ؟ قال: لان كان ( بس ديچك يعوعي ) واليوم المئات من الديكه ( تعوعي) قلت لان ديكي كان ( امسكت كل هاي الديوچه ) .... (هسه احنه لو ظالين على ديچنه المراهق والمسودن مو أحسن من هاي الديوچه الخكريه ) رحمك الله يا جدي حنش كنت حكيما . . .

مفتي الديار المقدسة الشيخ حنش بن أبي عفريت الحنشي

يروى ان جدي حنش ( حفظه الله وسدد خطاه ) تم اختياره ليكون المفتي العام لجامعة الدول العربية والاسلامية .. جدي حنش كان ورع ومؤمن (ينگط ايمان) في احد الايام كان ذاهب الى المسجد لإداء صلاة الجمعة والمعروف ان القادة والملوك العرب (هم حفظهم الله ورعاهم) لا يطيب لهم الصلاة الا خلف امامهم التقي الورع صاحب الكرامات الملا حنش .. وفي ذلك اليوم حدث امر غير متوقع وليس في الحسبان حيث قام مجموعه من الشباب المنحرف والضال المدفوع من قبل قوى الاستكبار العالمي ( جماعة هياته دمع العين هياته دا يكت) فاجابو (11) حبه مال كبسلة وخلوهه بگلاص عصير وخلطوهه وشربوهه لجدي حنش المهم الملا حنش الورع صعد للمنبر يخطب وگام يخيط ويخربط يجيب منا ويحط منا بعد مكبسل محد يلومه وبعد ما خلصت الخطبة راحوله جماعه من المصلين وگالوله مولانا: بالخطبة گلت معركة بدر شاركت بيهه طيارات من نوع اف 15 و16 والشبح وسكتنه .. وگلت صلاح الدين الايوبي ضرب القدس بالكيمياوي وغاز الخردل وغلسنه عنهه .. وگلت سيدنا معاوية هو وابنه سيدنا يزيد فازو بسباق رالي السيارات وهم بلعناهه ..بس قضية سيدنا ابو جهل باع سيدنا بلال الحبشي على نادي برشلونه بدفترين هاي كلش واگفه ما تدخل العقل ..لان سيدنا بلال يلعب وي نادي الميناء البصري . . الله يرحمك جدي حنش شگد چنت مؤمن ولو ضاعت علينه الحسبه وتشوه الدين الاسلامي من وره كم واحد مخربط . . ؟

تحت عباءة جدتي يغفو العراق :

تحت عباءة جدتي تنام بملءِ أحلامها الطيور وتغفو على صدى ترانيمها القلوب . تحت عباءة جدتي بحر متلاطم من الحب لا ينضب على مر الدهور والعصور وعنفوان عشق سرمدي الوجود . . ومدن من الإيثار وعواصم وفاء تفوق الخيال . تحت عباءة جدتي وطن جريح وقبر شهيد وطفل صغير بشظايا الغدر مذبوح . عباءة جدتي رغم سوادها الحالك من خلالها يبصر النور ورغم صغر حجمها فهي خيمة أمل نستفئ بظلها في أحنك الظروف . عباءة جدتي درع واق من الهموم وهلال عيد اليتيم وضحكة بشفاه مقهور . حين أكون تحت عباءة جدتي تأخذني الذكريات دون وجع هذه المرة فأستذكر زماناً كانت فيه قطرات المطر أكثر اكتنازا بالماء عندما تدغدغ بشغف وجه الأرض فيتعشق الأوكسجين المذاب بملح التربة لينبت قوس أمل ولحن سلام . كان للشمس مذاق وكان للشمس عطر حين تشرق وحين تغادر ارض العراق . كانت النجوم تخبئ أنوثتها على خجل بين طيات أمواج شط العرب خوفاً أن يرى صورتها القمر تنعكس على وجه الماء . زمان كانت الأيام أكثر فقراً وأكثر برداً لكنها أقل هماً وأقل قتلاً . .عجيب هذا العراق كل شيء فيه يغري وكأن الله لأجله دحى الأرض ورفع السماء وجعل أرضه مثوى للأنبياء والصالحين والأولياء . عجيب وغريب هذا العراق لاكته الرزايا والملمات العظام بكلتا فكيها منذ نعومة أظافره . . وتكالبت علية النائبات والأحقاد من أقرب المقربين له . . وتلاقى طعنات الإخوة والأصدقاء جهاراً نهاراً . . وذبحت أطفاله أمام عينيه بدم بارد بلا رحمة غير أنه لم ينثن ولم ينحن قيد أنملة أبى إلا أن يكون مشرئب العنق أبى إلا أن يصافح عنان السماء أبى إلا أن يكون كالثريا وللآخرين الثرى .تشرفت أرضه أن تحتضن موط أول قدم لأول سفير معتمد من قبل السماء . ناطح كل الحضارات وكل الثقافات حتى نطق لسان البشرية بأول حرف من بين شفتيه السومرية وسن أول قانون حين كانت الإنسانية تقبع في ظلام دامس من الجهل والهمجية . كان وطن للإنسان قبل أن يكون وطن للديانات . كان كعبة العشاق قبل أن يكون ارض للقوميات . كان ملاذ الخائفين وصومعة العلم ومسجد العارفين . كان أنموذج يحتذى بأخلاقه ومبادئه قبل أن يكون قطعة أرض تحتوي مجموعة من البشر . . فلم يكن سيابه واهماً عندما قال : ( الشمس أجمل في بلادي من سواها . . حتى الظلام هناك أجمل فهو يحتضن العراق ) . . فهذا الوطن المتجذر في أصالته وعمقه التاريخي بعد أن مرست ضده كل المؤامرات وكل صنوف الاختبارات من حروب طويلة ومعاناة ومجاعة وحصارات وطغاة غادرت وأخرى عادت وقتل على الهوية وقطع أعناق وأرزاق لهو قادر ان ينهض من جديد كالعنقاء ويسقط جميع الرهانات ويعيد للنخيل ابتسامته وللزرازير زغزغتها ويلوك بفكيه كل الرزايا والنائبات . . وتشرق من جديد شمس العراق التي لا تعلوها شمس ولا تحويها مجرة من مجرات الكون . . . فالسلام على جدتي والسلام على عباءة جدتي والسلام على وطن يضم رفاة الجدات . . .

مقال نشر لي في جريدة الزمان

تسواهن أم أحميـــد :

تسواهن ام أحميد مره چبيره بالعمر وخلفتهه بس أحميد هذاك اليوم شويبهه أنطاكم عمره وظلت تسواهن عزبه محد يسلي وحشتهه من راح شمعته بيتهه أبو أحميد بس من موتت المرحوم وليوم الله هذا صحتهه يوم عن يوم تنتكس .. أحميد ايحب امه كلش لان شاف منهه دلال بزغره افتر بيهه الدنيه كلهه ما خله طبيب ولا عارفه ولا كشاف يعتب عليه محد طاح عل علة مرضهه هذاك اليوم أحميد گاعد بباب البيت وصافن حسبه تأخذه وحسبه تجيبه ما حس اله وابو شنيور جيرانهم هو هم زلمه چبير بالعمر وكان صاحب ابوه گبل گاله هااا بويه أحميد الوالده ما صارت اشوه شويه گاله لا والله يا عمي بعدهه ذيچ هيه گاله بويه يگولون اكو طبيب توه مفتح عيادة ويگولون عنه ياخذوله البشر جنازه يرجع يركض مثل الحصان .. ثاني يوم أحميد اجر عربانه دفع حط امه بيهه واخذهه للطبيب فحصهه الطبيب عل حسب الاصول گاله ابني لا تخاف عل امك مابيهه بس العافيه وكتبله وصفه بخط واضح ( مو مثل الشخابيط اللي يكتبونه هاليام الاطباء) طلع من العيادة يدور عل اقرب صيدليه يجيب الدوه لامه ففتح الوصفه لگه مكتوب بيهه علاج امك ( شويب من نوع ابو شنيور جيرانكم تلاث مرات باليوم ) وگف أحميد گال اياااا ملعون الوالدين يا بو شنيور اگول يوميه داگ الباب علينه گبل طگه البريج وتسأل عن صحة امي .. امه لاول مره تحچي من مرضهه لهل يوم گالتله هااا يمه بشر شيگول الطبيب گاللهه يگول ازوجچ لابو شنيور گالتله اااي هذا بلاه امك يا أحميد .. يمه اذا چنت أطيب بهاذه الشي لا تقصر يوليدي انا اوممتك ياما ربيت وتعبت وسهر الليالي .. گاللهه يمه ايصير خير ان شاء الله المهم امه رجعت وياه تمشي على رجليهه ورجع عمرهه چنهه بت ام اربعطعش سنه ما اطول عليكم السالفه أحميد زوج امه من ابو شنيور وبعد سنه فطس ابو شنيور لان بالاساس كان اكسباير رجعت تمرضت مره ثانيه امه بس هالمره طيحتهه مال مواته اخذتلهه تلاث تيام اتجالع گبلوهه للقبله والتمن الحبايب عند راسهه هاي ال تنعاه وهاي ال تبچي وهاي الشاگه زيجهه وتلطم المهم وره شويه ام أحميد حركت ايده ومدتهه بجيبهه وطلعت ورقه .. أهنا أحميد بعد ما اتمالك نفسه انفجر من البچي گال هااااا يمه طلعتي الوصيه تردين توصين بعد مابيهه مجال راح تودعينه شگ زيجه وگام ينعه ( غريب من بعد عينچ يا يمه محتار بزماني ياهو ال يرحم بحالي يايمه لو دهري رماني حاچيني يايمه فهميني يايمه )

والحبايب يردن وراه ( يايمه .. يايمه ) ... گالتله لا يا بعد أمك واهلهه هاي وصفة الطبيب اللي اخذتني اله العام وبعد أمك وروحتهه هالمره ما اوصيك مو تجيبلي دوه أكسباير مثل ابو شنيور ....!!!!!

ما ادري عليمن جبنه رباط السالفه نسيت بلكي تذكروني لان هاليام ذاكرتي مسرده من وره سوالف أم أحميد وارجولتهه ؟!!!

من زعيبل الــى جعيول السلف ينهض من جديد :

زعيبل لا شغل ولاعمل عايش على النصب والاحتيال وكل ما يمتلك هايشه بگعه واحمار اجرب هذاك اليوم بوكت الحصاد ذبح هايشته وعزم عليهه كل اهل السلف وكان متأمل من وره العزيمة كل واحد راح ينطيه شوية من المحصول بس محد انطاه ولا حبة حنطه ثاني يوم اخذ جلد الهايشه وراح للشط يغسله شافوه اهل السلف گالوله هااا اليوم تغسل بلجلد گال اي راح ابيعه فضحكو عليه زعيبل اخذ الجلد على احماره وراح يبعه بالسوگ صار عليه وكت الظهر شاف بيت بالطريق گال خلي ارتاح واتغده واضيف هذا البيت ما لگه بس المره بلبيت فرحبت بيه وگالتله اتفضل استريح بالمضيف حتى يجي ابو البيت وگعد بلمضيف فسمع صوت رجال اسنغرب وسمع ام البيت تگوله هذا دجاج ولحم اكل يابعد طوايفي اكل بالعافيه . شويه وسمع واحد من الجهال يصيح يمه يمه اجه ابوي زعيبل يتصنت لأم البيت سمعهه تگول للرجال الي عدهه البد بلجدر الچبير وانا راح اضم الاكل جوه المعجانه واول ماوصل ابو البيت رحب بضيفه وصاح على مرته يله ولچ حضري الغده جابت الغده خبز وبصل اخضر صفن زعيبل گال ويه نفسه چا وين اللحم والدجاج فبهل الاثناء گام ينهگ الحمار گامله زعيبل وبالعصا شبع بيه كتل صاح علية ابو البيت ليش خطية مو هذا حيوان گاله ياحجي هذا الحمار مفشلني ما يعرف يضم سالفه يسمعهه وانا اعرف شگاعد يگول بنهيگه گاله بله شيگول گاله يا حجي خلي السالفه مطمطمه گاله اليوم الا تعلمني شگال احمارك گاله يگول عيب على المعزب عنده لحم ودجاج جوه المعجانه ويجيب لخطاره خبز وبصل فراح ابو البيت رفع المعجانة شاف لحم ودجاج فندهش وبعد ما تغدو نهگ الحمار مره ثانيه گاله هسه شيگول احمارك يا زعيبل گاله يگول گل لمعزبك خلي يحمي جدر ماي كون يفور ويذبه بالجدر الچبير اللي عدهم فسوه مثل ما گاله زعيبل وحمه الجدر الى ان فار وجابه وذبه بالجدر الچبير فما سمع بس اااخ يابويه باوع ابو البيت وشاف زلمه بلجدر گال هذا منو جابه هذا ابن عم مرتي بس ابيناتنة ثار محد يوصل لثاني سأل مرتة هذا شيسوي اهنا جاوبت ام البيت جابلي اغراض من امي وسمعت بيك اجيت فلبدته هنا .. ابو البيت شلون هسه هذا مات شراح يخلصنة من عشيرتة زعيبل گاله ولي يخلصك من هاي البلوه شتنطيه گاله اطلب وانا انطيك زعيبل طلب مية دينار وافق ابو البيت فلف الميت بلحصير وخلاه على الحمار وراح يمشي فوصل قرية راح اشترى دشداشه وعباية وعمامة ورجع لبس الميت الدشداشة والعباية وحط العمامة على راس الميت وشده على الحمار وهد الحمار على بيدر الحنطة مال القرية فكام ياكل الحمار شافوه من بعيد اهل القرية صاحو عمي وخر احمارك عن الحنطات لا نلعن والدي والديك هذا ميت وين يسمعهم ملو من الصايح عليه فواحد منهم رماه چيله والله جابهه بعرج الاذن فطاح عالگاع اجه يركض زعيبل ويصيح ياخويه ياحزام ظهري كتلوك الما يخافون من الله الله ينتقم منكم اليوم وين ترحون مني ومن عشيرتي شيخ عشيرة الفريه گاله عمي ما متعمدين نكتل اخوك واحنه بخدمتك ماكو داعي توصل لعشيرتك اطلب واحنه فصاله گاله هذا اخوي اشعرت گلبي وما يتعادل بالفلوس المهم بعد جدل طلب منهم زعيبل الف دينار فصل مال اخوه وبفلوس الفصل راح اشتره هوش وغنم ورجع للسلف الي چان بيه فشافوه اهل السلف وتعجبو منين جبت كل هاي الفلوس يا زعيبل گاللهم من الجلد الي بعته .. ثاني يوم اهل السلف كلمن ذبح هايشته وراح يبع جلدهه بالسوگ

أحــديده عــن الطنـطـل :

كثيراً ما حدثتنا عجائزنا عن الطنطل عندما كنا صغاراً .. ما زلت أتذكر جيداً الرهبة والخوف اللذان ينتاباني عندما أكون لوحدي أو في مكان مظلم من خطر بروز هذه الشخصية الأسطورية أمامي فجأة .. لا أعرف لماذا استحضرت ذاكرتي من بين كل ذكريات الطفولة هذه الشخصية المرعبة ! ربما لأني تذكرت حكاية أحد الأصدقاء الذين غادروا الوطن مؤخراً فتكبدوا عناء السفر من غير فائدة ومن ثم عادوا بخفي حُنَيِن .. وحكاية صديقي تتلخص بالتالي : ( حصل على الإقامة في السويد وچان بالعراق يدخن كل يوم باكيت جگاير ومن أجه للسويد صار يدخن أربع باكيتات يوميه ويشتغل ليل نهار حتى يوفي الديانة.هذا المسكين دايخ ما يدري شيسوي يدور على شقه يسكن بيهه ولو بغرفة وحدة وفد يوم وهو يمشي على خانك يا دهر لگه قوري مشمور بالزباله فأخذه ومسحه ابوصلة بازة لا تسألوني امنين جاب البازة بالسويد ما ادري .. المهم اخذ القوري او مسحة فطلعلة من القوري بخار ثم ضباب فگال وي نفسه مناعيل الوالدين أهل السويد چايهم يبقى حار حتى لو بات بهاذ الجو البارد .. وره اشويه طلعله من نص الضباب طنطل عيونه شاخصة بالحق وراسه يطخ بالغيم ولحيته داعشيه وصدره چنه صدر لوري اقچم .. مصلخ بس لاف وزره على وسطه يغطي بيهه فقط ما حرم الله ظهوره على الشاشة العريضة .. وبدون مقدمات راح يصيح مثل طرزان بالغابه...شبيك لبيك عبدك بين أديك..صاحبنه العراقي مات من الخوف وتكوم بالگاع اوچان يرجف (مثل سعف نخل البصرة الخاوي من گد العطش وعدم الاهتمام) .. والعرگ بده يغطي وجهه لا اگلكم ولا اتگلولي بال على روحة من گد الخوف المهم صاحبنه فكر وي نفسه وگال بس لا يطلع هذا الطنطل قشمريات مثل طناطل جماعة المنطقة الخضراء وناصب عليه واليوم ينلعب بيه طنب وتشتغل الدفرات والقنادر وأنعلس علس بهذي الليلة السودة . الطنطل شاله من ياخته وگاله: لك أرفع راسك أنته عراقي وابو الغيره قشمر أغبر مو دا أگول شبيك لبيك عبدك بين أديك ...متحچي وتخلصني مو متت برد وأنا مصلخ والسويد شوارعهه مغطايه بالثلج أذا اتمرضت ماعندي فلوس اروح للمستشفى ووزارة الصحة رافعه التسعيرة .. طرطور تبقى متفتهم .. صاحبنه العراقي بلع ريگه وگال: عمي طنطل فدوه أروح ألهل طول وألهل جهره أنا صارلي شهرين دايخ أدور على شقه بلكت تحچي وي الحكومه ينطوني شقه أسكن بيه... الطنطل شمره صاحبنه علگاع وصفن صفنة طويلة ( صفنته چبير العمر من يذكر شبابه) او چان ايگله: لك أنته صدگ أطباگات وأرعن ..هيه لو أكو حكومة صدگ وتباوع لشعبهه چان أنا اسكن بهذا القوري .. طلع صاحبنه الطنطل هم عراقي . . ) فرباط السالفة

عندما تغفل الحكومة والحكام عن القضايا الأساسية والمصيرية للدولة والشعب من المفروض أن توخزهم شعوبهم وخزة موجعة توقظهم من سباتهم قبل فوات الأوان ليتفادوا ما فاتهم او يتداركوا بعض مما يمكن إنقاذه. والوخزة نقصد بها التظاهرات والاحتجاجات والتعبئة الجماهيرية وتحفيز وسائل الإعلام لتأخذ دورها في توعية الرأي العام المحلي. وإذا غفل الشعب أو تغافل عما يخص قضاياه المصيرية تحولت المسئولية على وسائل الإعلام باعتبارها السلطة الرابعة والمعبر الحقيقي عن تطلعات وآمال الشعوب أما إذا كان الإعلام بوقاً من أبواق الحكومة ومصلحته فوق كل شيء ولا يجرؤ على إيقاظ الحاكم من سباته أو توعية الشعب بحقوقه وهذا من صلب واجباته تحولت المسئولية تلقائيا إلى النخب المثقفة والطليعية في المجتمع وإذا تعطلت كل هذه الوسائل فحضر الكفن واقرأ الفاتحة على مصير هذا الوطن وهذا الشعب .. واليوم وصلنا إلى قراءة سوره الفاتحة على روح الوطن والمواطن بل الادهى والامر متنه وشبعنا موت كيف لا يكون ذلك وقد أصبحت الحكومة وكل سلطاتها والإعلام وحتى الشعب أحديده عن الطنطل . . فالسلام على ايام الطنطل وعلى ايام زوجته السعلوه ؟!!!!